агри.мк Портал за промоција, развој и поттикнување на земјоделството во Македонија
Жетвата на оризот во велешко е при крај. Под оваа култура годинава беа посеани 120 хектари, а досега родот е собран од над 80 хектари. За собирање на родот ангажирани се петнаесетина комбајни и друга приклучна механизација.
Производителите од населените места по течението на реките Тополка и Бабуна се повеќе од задоволни како од гарантираната откупна цена така и од приносите и квалитетот на оризовата арпа. Од хектар се собираат од 6 до 8 илјади тони арпа што е повеќе од добра. Велат дека Владата повторно им излегла во пресрет и дека со одредената откупна цена од 20 денари за килограм оризова арпа не само што добро ќе заработат, туку таа цена во многу ќе придонесе оваа земјоделска култура повторно да се врати на полињата во велешко.
-Со гарантираната откупна цена од 20 денари за килограм арпа, плус зголемените субвенции Владата ни помогна многу. Годинава имав 7, а догодина ќе посеам ориз на 15 декари. Добро ќе заработам. Најдов повеќе од пет тони, што е повеќе од добро – вели Ангелко Трајков од селото Лисиче.
По подолг период производителите годинава немаа проблеми со вода за полевање на оризовите полиња. Со изградбата на браната на хидросистемот Лисичее, коритото на реката Тополка и во најжешките денови беше полно со вода. Цената, субвенциите и доволните количества на вода во многу ќе придонесат идната година под ориз во велешко да бидат посеани повеќе од 300 хектари. Пред три децении под ориз во велешко оризот беше застапен и на повеќе од 700 хектари.
-Поранешен работник сум на Порцеланка. Со нејзиното затварање останав на улица и без егзистенција. Се вратив на родното татково огниште. Одгледувам тутун, градинарски култури, а посеав и пет декари под ориз. Со оваа цена добро може да се живее. Греота е ако не кажам дека како оваа ниту една досегашна Влада не направила толку многу за развој на земјоделството – вели Митко Игнов од селото Еловец.
Од 120-те хектари земјоделците од Еловец, Голозинци, Лисиче, Мелница, Стари Град, Долно Врановци планираат да соберат над 600 тони оризова арпа. Поголем дел од неа веќе ја продаваат на купувачи од кочанскио, штипскиот и скопско, а дел планираат да го преработат во бел ориз.
Извор: http://vecer.com.mk/?ItemID=7E521F1ADCEA8F42B5521D85FE8C70E2
