Во Џумајлија ќе се вложат 200 милиони евра и ќе се вработат 2.000 лица

Премиерот Никола Груевски не сакаше да го обелодени името на инвеститорот, но информираше дела завршен е огласот за избор на концесионер за Џумајлија.

Инвестиција од најмалку 200 милиони евра во агрокомбинатот “Џумајлија” и вработување на две илјади лица најавува фирма-ќерка на позната мултинационална компанија која сериозно е заинтересирана за вложување во овој сектор. Премиерот Никола Груевски не сакаше да го обелодени името на инвеститорот, но информираше дела завршен е огласот за избор на концесионер за Џумајлија,
-Оваа компанија вели дека ќе инвестира над 200 милиони евра во наредните три години, како што налагаат условите во јавниот повик и оти ќе вработи најмалку две илјади лица – вели Груевски и појасни дека сега следи фаза на евалуација, а потоа и потпишување на договорот.
Според него инвестицијата е особено значајна, ќе значи голем препород за регионот кај Џумајлија, оти ќе се вработат и добијат егзистенција над две илјади невработени. Компанијата истовремено најавува дека ќе донесе над 20 илјади грла говеда, ќе изгради фабрика за сточна храна и млекарница со голем капацитет. Нивните планови се покривање не само на македонскиот и регионалниот пазар, туку да продаваат и низ цела Европа.

Се зголемува и бројката на зоните во земјава, така викендов во месноста Алинци кај Прилеп е поставен камен-темелникот за изградбата на новата Технолошко-индустриска развојна зона.Истовремено оваа Општина со брзо темпо ја оформува индустриската зона Прилеп 11, за мали и средни претпријатија каде се распродадени парцелите и наскоро ќе почне изградбата на капацитетите.
– Големите инвеститори во оваа зона ќе отворат и голем број работни места. Зоната има плански опфат од 67 хектари со можност за проширување на уште 35 и ќе биде поврзана со патна, водоводна, електрична и канализациска мрежа. Со ова и со условите во зоната Прилеп, Битола, Ресен, и околните населени места ќе добијат простор кој верувам дека ќе привлече голем број заинтересирани инвеститори-информираше Груевски.

Тој укажа дека паралелно со уредувањето на технолошко- индустриските развојни зони во државава и бројните економски мерки и стимулации, владините тимови задолжени за промоција на инвестициските можности за Македонија, продолжуваат со бројни презентации и промоции во многу светски земји.

Според директорот на Дирекцијата за технолошко индустриски развојни зони Виктор Мизо, оваа зона е една од 11-те во државава кои даваат резултати.
– Доказ за тоа се Џонсон контролсс и Џонсон Метии кои лани во вкупниот извоз на Македонија учествуваа со 16,3 проценти, а годинава се очекува нивното учество во извозот да биде 20 отсто – потсети Мизо.
За министерот за странски инвестиции Веле Самак во зоната со дополнителни проекти своето место ќе можат да го најдат и домашните фирми.

Градоначалникот на Прилеп, Марјан Ристески, посочи дека со изградбата на оваа развојна зона и со индустриската зона Прилеп 11, каде сите парцели се распродадени, Прилеп се промовира како вистинска дестинација за привлекување на странски гринфилд инвестиции, но овозможува развој и на домашните фирми.
– Во Прилеп за една година се изготви Генералниот урбанистички план, донесени се детални урбанистички планови за овозможување на атрактивни локации не само за развој на економијата, туку и за нов станбен и деловен простор. Дваесетина локации во индустриската зона Прилеп 11 се продадени, се прави целосната инфраструктура и наскоро ќе се градат новите капацитети на претежно прилепските фирми со што ќе се обезбедат близу 2.000 нови вработувања-вели Ристески, нагласувајќи дека веќе се подготвува и другата индустриска зона Прилеп 22 за малото стопанство и лесната индустрија со можност за нови 1.000 вработувања. Според него со продажба на парцели на повеќе локации во градот, се отвора можност за понуда за 300 станбени единици, а тука е и новата современа европска населба Градина каде за парцелите постои огромен интерес.(В.Ма.)

Македонија излезе од рецесија со помош на градежништвото
Што се однесува за излезот на земјава од рецесија и растот на БДП од 0,2 проценти за третиот квартал од годинава премиерот смета дека тоа се должи на поддршка на градежништвото и странските инвестиции.
– Ме радува овој податок, затоа што во време кога голем број од државите во Европа се уште тонат во рецесија или некои од нив штотуку влегуваат, со сите напори што ги направивме за раздвижување на економијата се успеа некако да се излезе од неа. Успеавме да ги раздвижиме работите, но не е доволно, затоа уште повеќе ќе работиме на тоа – нагласи Груевски.
Тој потсети дека фокусот беше насочен кон градежништвото иако имаше голем број на критики, а втората значајна работа е што се успеа да се привлечат крупни компании што сега се главно моторна сила на економијата како “Џонсон Мети”, која го зголемува извозот за 18 проценти, а “Џонсон контролс” за 10 проценти.
Но, потсети премиерот Владата донесе и повеќе значајни мерки и реформски движења со кои им помогна и на домашните компании.

Извор: http://vecer.com.mk/?ItemID=338F1243764BF64D96357BF62642DBAA