агри.мк Портал за промоција, развој и поттикнување на земјоделството во Македонија
До крајот на годинава Македонија ќе почне да извезува вина со заштитено географско потекло под ознаката повардарски”. Оваа географска ознака што е веќе дефинирана, најпрво треба да се регистрира во земјава, а потоа и во ЕУ.
– Македонските вина имаат добра репутација на Балканот, но се уште се недоволно познати во ЕУ. Градењето на репутацијата на “географски ознаки” создава позитивна перцепција и препознатливост на производите. Пробивот на странските пазари можеме да го градиме само со здружени сили и заеднички настапи и промоции на македонските винарии – изјави Владислав Попов, претседател на Здружението за заштита на географската ознака за вино “Повардарски”.
Според него, неопходно е најпрво брендирање на Македонија како винска земја од каде доаѓа квалитетно вино, а потоа поединечен пробив на секоја винарија на пазарот.
– Регистрирањето и промоцијата на “географски ознаки” ќе пружат огромна помош и поддршка во градењето на имиџот за Македонија како винска земја и ќе дадат “гаранција” на странскиот купувач дека виното произведено со одредена географска ознака е вино со специфични карактеристики од регионот каде се произведува – истакна Попов.
Фредерик Џулија, меѓународен експерт за вино – ФАО консултант, истакна дека доколку квалитетот на производот е постојан, доколку правилно се промовира “географската ознака” и доколку сите учесници во синџирот вклучително винариите и производителите на грозје споделуваат заеднички имиџ и приказна за производот, употребата на Географска ознака (ГО) на етикетите ќе создаде додадена вредност на виното.
– Со географскиот индикатор повардарски”, македонските вина ќе може да се борат на светската арена паралелно со вината од другите земји. Останува на производителите да ја прифатат, искористат и промовираат оваа алатка и да профитираат од тоа што го имаат – изјави Фредерик Жулие од ФАО.
Иницијатор за воведување на ознаката беше здружението Вина од Македонија” кое изминативе две години интензивно работеше со поддршка на ФАО и ЕБОР.
Извор: vecer.com.mk
