Кисела Вода конечно ќе добие зелено пазарче

Пазарот ќе се простира на површина од 250 метри квадратни и ќе бидат поставени околу 40 тезги со настрешница. За неговата изградба Кисела Вода ќе одвои околу 4 милиони денари, а се очекува да биде готов за два месеци

Иако најстара од скопските општини и втора по бројот на жители, во Кисела Вода се уште нема зелено пазарче. Место каде што најмногу се пазарува сезонско овошје и зеленчук и каде жителите ги набавуваат свежите продукти во Кисела Вода нема, па тие тоа мораат го чинат од малите диви пазарчиња на тротоарите или од камионите. Граѓаните раскажуваат дека ако сакаат да заштедат некој денар, мораат да пазарат од производите кои се нудат од улица или паркинг.
– Ако не купиме од продавачите кои нудат од своите камиони или на тротоарите, мора да одиме дури до Зелен пазар во Центар или до другите блиски пазарчиња. Со години чекаме да ни се отвори еден централен пазар како што имаат сите населби. Овие импровизирани мали пазарчиња кои на диво работат ќе можат да се соберат на едно место и нормално, од тезга да ги продаваат своите производи. Зелениот пазар би им дал вистински услови на продавачите, а воедно и ќе го подобри нивото на хигиена на храната која сега се продава, ни одговори Велко Стојановски, постар жител од оваа населба.

Кисела Вода по повеќе од 50 години, конечно, ќе добие зелено пазарче. Минатата недела, општината склучи договор со градежната компанија “Бортас” од Скопје која беше избрана да го гради објектот. Пазарот ќе биде лоциран на улицата “Франк – Харкорд Манинг” и ќе зафати околу 250 метри квадратни, а се очекува да биде готов за околу два месеци. Општината за оваа намена од својот буџет издвои околу 4 милиони денари. Оттаму велат дека подолго време планирале да го реализираат овој проект и конечно ќе можат да одговорат на барањата на граѓаните.
– На улицата “Франк Харкорд Манинг” во населбата Кисела Вода за два месеци ќе никне нов зелен пазар. Тој ќе се простира на површина од околу 250 метри квадратни, каде ќе бидат поставени 40 тезги со настрешница за продажба на земјоделски производи. Во рамките на пазарот ќе има неколку чешми за вода и тоалети, а ќе биде обезбеден и пристап за возилата кои ќе ги доставуваат производите. Одржувањето на пазарот ќе биде во надлежност на ЈКП “Комуналец” – Кисела Вода.

Во изминатиот период на оваа локација егзистираа неколку тезги за продажба на земјоделски производи, кои никако не можеа да ги задоволат барањата на жителите на Кисела Вода за земјоделски производи. Со изградбата на овој прв зелен пазар од страна на општината, конечно ќе се исполнат барањата на жителите на населбата Кисела Вода за изградба на зелен пазар, соопштуваат од општината.

Со ова од Кисела Вода очекуваат да го решат проблемот со големиот број диви продавачи кои го запоседнуваа слободниот простор кај салата Расадник, како и на други места во оваа населба. Сега тие ќе бидат сместени на едно место и своите производи наместо од наредените кутии или камиони ќе ги нудат од тезга.

Извор: http://vecer.com.mk/?ItemID=D66BC5CBE315C2468D36D134AD5F32FC