Пламеницата предвреме обра дел од грозјето во Тиквешко

Пламеница како болест на виновата лоза ги нападна лозовите насади во Тиквешко како последица на долготрајните дождови оваа пролет.

Ова негативно ќе се одрази и на родот на виновите лози и на џебот на лозарите, оти во вакви услови се потребни поголем број третирања со хемиски препарати. Дека пламеницата сериозно се заканува предвреме да обере дел од грозјето, потврдува и Благоја Мишковски, професор по стручни предмети во земјоделско-шумарското училиште во Kавадарци. Најзагрозени десертни сорти на грозје се „мишел палиер“ и „викторија“, а од винските, „вранец“.

Зголемени трошоци

Болеста се манифестира со сушење на дел или на цели гроздови како да се од пламен изгорени или попарени со врела вода. Најмногу страдаат лозјата што се покрај реки и во ниски микролокации наспроти тие што се на повисока надморска височина и на места со провев.

– Причина за појава на болеста се честите врнежи од дожд и високата релативна влажност на воздухот, како и поволните температури за развој на паразитот. Спорите на пламеницата ’ртат во капка вода. Годинава има идеални услови за нејзин развој, оти не врне повремено, туку со денови. А, се најавуваат и нови дождови, кои дополнително би ја искомплицирале веќе комплицираната состојба – објаснува Мишковски.

Тој кажува дека производителите на грозје користат по две-три скапи активни хемиски материи, но на некои не им успева да застанат на патот на болеста.

– За да се надмине или барем да се ублажи проблемот, се препорачува масовно лачење на листовите од лозата од кај што ја грее сонцето. За подобро да се гледа родот и препаратот подобро да навлезе. Да се користат две активни материи за контактно и за системично дејствување. Редовно да се следат временската состојба и прогнозите, па третирањето со хемиски препарати да биде најмалку два-три часа пред дождот, а не по долготрајните дождови. Во вакви услови, според мојата процена, тројно ќе се зголемат трошоците за фитозаштита – вели професорот, кој 33 години држи теоретска и практична настава по заштита на растенија.

Страдаат листовите и гроздот

Лозарите со кои разговаравме се во паника стравувајќи за својот род. Се плашат да не го изгубат, особено поради фактот што се најавуваат и дополнителни врнежи од дожд. Велат дека грозјето им се суши уште на стартот и може ништо да не остане од него.

– Ниту тие кај кои пламеницата е на почеток не можат да се справат со неа, а камоли оние кај кои таа веќе зема замав. Можеби сепак полесно ќе ја пребродат болеста породните сорти грозје, кај кои сепак можеби ќе остане дел од родот. Но, тешко на тие што раѓаат малку – коментира Златко Стојчев од кавадаречкото село Сопот, кој е еден од оние во земјва што обработуваат најголеми површини под лозов насад.

Нагласува дека сега треба да пристапат кон повеќе хемиски третирања, што дополнително негативно економски ќе влијае врз производството. Оти станува збор за скапи препарати, а тие за да го спасат родот, користат зголемени концентрации и дупли дози од препорачаните.

Од Мишковски дознаваме дека од пламеницата страдаат и листовите, но со нив ситуацијата не е толку страшна. Пострашно е кога страдаат штотуку формираните гроздови, во фаза на цут или со формирани зрна.

ШТЕТНИКОТ НАПАЃА НИЗ ЦЕЛАТА ЗЕМЈА

Дека состојбата со пламеницата е загрижувачка и тоа не само во Тиквешко, туку и во другите лозарски региони во Македонија, потврдува и Тони Богев од Kавадарци, сопственик на земјоделска аптека.

– Лозарите доаѓаат и очајнички бараат помош од нас за да го решат проблемот со болеста во своите лозја. Ситуацијата е алармантна. Многу често утрата имаат роса, па се случува и ние да се замислиме кога препорачуваме кој лек да го дадеме. Се трудиме да помогнеме и да се справиме со пламеницата, но нејзиниот замав навистина е критичен, особено кај трпезните сорти грозје и „вранецот“ како винска сорта. Времето не помага. Вака како што оди, производството на грозје веќе станува економски неисплатливо – вели Богев.

Извор: dnevnik.mk